Umaaray ngayon ang mga tricycle drivers sa Cabanatuan City dahil lumiit na umano ang kanilang kinikita dahil sa panghaharang sa kanila ng mga pulis, legalization officers, at traffic enforcers na pumasok at mamasada sa bisinidad ng public market.
Bukod sa palaisipan na nga kung sino ang nag-utos sa mga otoridad, malabo rin umano ang dahilan kung bakit sila binabawalan na pumasok at mamik-up ng pasahero sa loob ng palengke.
Ayos lang naman daw na linisin ang palengke pero sana naman ay ayusin ang patakarang pinaiiral at maging patas sa lahat ang kinauukulan.
Maging ang mga tindera ng palengke ay apektado rin ang hanap-buhay dahil sa pagbabawal ng pagpasok ng tricycle.
Ayon kaya aling Lanie, kung dati ay kaya niyang kumita ng hanggang mahigit tatlong libo isang araw, ngayon, simula ng harangin ang mga tricycle na pumasok sa palengke, bumagsak sa isanlibo hanggang walong daang piso na lang ang kanyang kita.
Hati naman ang opinyon ng mga mamimili, merong mga pabor at mayroon din namang kumukontra sa pagbabawal ng pagpapapasok ng tricycle sa palengke.- Ulat ni Clariza De Guzman
