CLSU Maestro Singers, back to back champion sa international choir competitions
Back to back champion ang Central Luzon State University Maestro Singers sa dalawang magkaibang international choir competitions na ginanap sa Japan at Taiwan nitong July 29 hanggang August 2, 2022.
Umani ng mga pangunahing parangal ang CLSU Maestro Singers sa ilalim ng Category V o virtual category 2022 Tokyo International Choir Competition sa Harumi na ginanap sa Dai-ichi Seimei Hall, Tokyo, Japan.
Kasama sa mga parangal ang Category Winner na may score na 89.40, Gold Prize Award at Audience Prize Award para sa pinakamataas na bilang ng likes sa Youtube.
Nasungkit din ng nasabing grupo sa Taipei International Choral Festival ang dalawang parangal na Category Winner para sa Virtual Choir Competition at ang Gold Award na may markang 90.15.
Hindi naman inexpect ng grupo na sila ang mananalo sa kategoryang kanilang sinalihan dahil mahuhusay ang kanilang mga nakalaban na mula sa Japan at Taiwan.
Ang kanilang masterpiece version ng “Paraiso” na isinulat ni Ryan Cayabyab at inayos ni Christopher Borela ang kanilang naging entry sa dalawang nabanggit na kompetisyon. Kasama sa kanilang naging premyo ang tropeo at certificate.
Ang CLSU Maestro Singers ay kilala na sa pagsali sa mga international choir competition kung saan ngayong taon ay tatlong beses na silang lumahok sa ibang bansa at lahat ng ito ay kanilang napagtagumpayan.
