Nagsagawa ng serye ng cooking fest ang iba’t ibang barangay sa San Jose City bilang bahagi ng pagdiriwang ng Buwan ng Nutrisyon.
Nito lamang Hulyo 27 nang ihain sa Brgy. Porais ang iba’t ibang klase ng luto ng tokwa o tofu kung saan pumatok at nagwagi ang tofu croquettes, tokwa ala king at sizzling tofu.
Nauna pa dito noong Hulyo 26 naman ay katakam-takam na luto ng mga gulay ang ipinamalas ng pitong grupo ng mga kababaihan sa Brgy. Culaylay.
Kanya-kanya sa diskarte ang mga kababaihan sa pagluluto ng mga gulay na labong, kangkong, petchay, talong, kalabasa at patatas.
Nagwagi dito ang “Dinengdeng ti Ilokano with Shanghai ala Labong” ng grupo mula sa Zone 6.
Kasabay naman ng oath taking ng San Jose City Federation of PWDs noong July 25 ay nagsagawa din ng cook fest na nilahukan ng mga person with disability sa Pag-asa Sports Complex.
Hinati ang patimpalak sa apat na kategorya para sa mga rekadong ginamit, nariyan ang puso ng saging, karne ng manok, baboy at isda.
Bahagi din ang naturang aktibidad ng pagdiriwang ng 44th National Disability Prevention and Rehabilitation Week na may temang “Pamahalaan kabalikat sa pagtupad ng pantay na edukasyon, trabaho, at kabuhayan tugon sa pagpapalakas ng taong may kapansanan”.
Bumida din ang mga nanay sa Brgy. Pinili noong July 20 sa pagmamalas ng kanilang galing sa pagluluto, kasunod ang pagpapakitang gilas ng mga chikiting na rumampa habang suot ang iba’t ibang gulay sa Little Miss Nutrition 2022.
