Sa pamamagitan ng isinagawang media tour ng Department of Social Welfare and Development sa bayan ng Gen. Mamerto Natividad noong Oktubre 11, 2018 ay ipinasilip sa amin ang mga proyektong naisakatuparan ng DSWD na kahilingan ng mga mamamayan ng Barangay Mataas na Kahoy at Picaleon.
Ito ay sa ilalim ng programa ng Kapit-Bisig Laban sa Kahirapan-Comprehensive and Integrated Delivery of Social Services o Kalahid-CIDSS na nalalapit na ang pagtatapos sa susunod na taon.
Unang dinalaw ng grupo ay ang Mataas na Kahoy National High School na tinayuan ng dalawang classrooms na hiniling ng mga magulang ng mga mag aaral dahil sa kakulangan ng silid-aralan sa nasabing paaralan at maiwasan na ang pagdayo ng kanilang mga anak sa ibang lugar para doon mag aral.
Ayon kay Nenita Dominggo, English Teacher at kasalukuyang Faculty President ng Mataas na Kahoy National High School ,dahil sa biglaang pagbabago ng edukasyon sa bansa ay kinailangan din aniya nilang magkaroon ng sapat na silid aralan dahil limitado lamang aniya ang kanilang pasilidad.
Nagpapasalamat naman si Rosana Ferin, aktibong volunteer mula sa Purok 4 ng Mataas na Kahoy dahil aniya sa pagtugon ng DSWD Kalahi CIDSS ng mga kakulangan sa kanilang Barangay ay nagkaroon sila ng kamalayan at mas binibigyang pansin na nila ngayon ang mga pangangailangan ng kanilang mga ka-barangay.
Sumunod na pinuntahan ng grupo ay ang Barangay Picaleon upang makita at makapanayam ang mga benepisyaryo ng anim napung solar power street lights sa lugar.
Inisa isa naman samin ni Cesario Junior Villarico, Committee Empowerment facilitator ng General Mamerto Natividad, ang dahilan kung bakit ilaw sa kalsada ang unang idinulog ng kanilang nasasakupan kagaya ng nagkakawalaan ang mga palay sa tuwing sasapit ang anihan at nagiging delikado para sa mga kabataan lalo na sa mga estudyanteng pumapasok ng madaling araw at umuuwi ng gabi.-Ulat ni GETZ RUFO ALVARAN.
