Anim na raan at limapung relief packs at hygiene kits ang ipinamahagi ng Pamahalaang Panlalawigan sa mga residente na naapektuhan ng Bagyong Ompong sa tatlong barangay sa Cabanatuan City, ngayong araw ng linggo, September 16, 2018.
Ito ay hinati sa Brgy M.S. Garcia na may kabuuang 313 na pirasong relief packs at hygiene kits, 304 sa Brgy Vijandre (Lazaro Francisco Elementary School) at Brgy Villa Ofelia na may bilang naman na 33.
Ang mga relief ay mula sa Provincial Social Welfare and Development Office (PSWDO) habang ang hygiene kits ay galing sa National Disaster Risk Reducation and Management Council (NDRRMC).
Pasasalamat naman ang tugon ng mga resideteng nabigyan ng tulong.
Ayon kay Provincial Social Welfare and Development Officer (PSWDO) Elvie Ronquillo, base na rin sa inisyatiba ni Gov. Czarina “Cherry” Umali ang lahat ng mga humihingi ng tulong sa kapitolyo ay pagbibigyan at walang pipiliin lalong higit sa ganitong sitwasyon na may kalamidad.
Nauna nang nagpamahagi ang Pamahalaang Panlalawigan ng 811 food packs sa iba’t-ibang evacuation centers sa lalawigan nitong mga nakaraang araw.
Siniguro ni Ronquillo, na may mga nakahandang relief packs para sa iba pang nangangailangan.
Inaasahan na tuloy-tuloy ang pamamahagi ng tulong ng Provincial Government sa mga nasalanta ng bagyo. – Ulat ni Danira Gabriel
