Evacuation centers, relief goods at equipment ng Muñoz at Rizal, nakahanda na!
Nakahanda na ang mga lokal na pamahalaan ng Lungsod ng Muñoz at Bayan ng Rizal para sa bagyong Ompong na makaaapekto sa ating lalawigan.
Ayon kay Mayor Lito Andres ng bayan ng Rizal, noong nakaraang linggo pa lamang ay preparado na sila sa pagdating ng bagyo. Malimit din ang kanilang pagpupulong sa mga punong Baranggay upang mag antabay, at magbigay babala para sa preemtive evacuation.
Lunes, September 10, 2018 pa lang din aniya ay nakagayak na rin ang 700-800 relief packs na ipamimigay sa mga pamilyang maapektuhan ng nasabing bagyo.
Kasado na rin aniya ang kanilang mga heavy equipment katulad ng backhoe, loader, dumptrucks, ambulances, behikulo na gagamitin pang-rescue sa mga evacuees.
Ayon naman kay Eliza S. Valdez, Municipal Disaster Risk Reduction Management Officer, ng Munisipyo ng Rizal, handa na rin ang kanilang dalawang evacuation centers na kumpleto ang pasilidad katulad ng
Breastfeeding room, playing area, couple’s room, operation center, stock room, comfort room,Kitchen area, laundry area. At may itinalagang lugar din para sa kanilang mga alagang hayop na hindi maiwan.
Paalala ni Mayor Lito Andres sa mga kababayan nyang Rizalenyo na palaging maging alerto sa panahon ng kalamidad.
Ayon naman kay Engr. Josefino Foscorrea, City Disaster Risk Reduction Management Officer ng Science City of Muñoz, sinabi nito na nagpalaganap na sila ng impormasyon sa pamamagitan ng forecaster typhoon truck, Muñoz cable, at pagmomonitor sa social media, nagkaroon din sila ng dayalogo sa mga opisyales ng barangay upang mapaggayakan ang hagupit ni Ompong na inaasahan.
Nagtabas na rin aniya sila noong nakaraang Miyerkules, September 12, 2018 ng halos tatlumpung puno na posibleng makasagabal sa mga kalsada.
Panawagan naman ni Engr. Foscorrea sa mga taga Munoz na laging mag ingat, magplano at maghanda para sa darating na kalamidad.
