Personal na ring nagtungo sa Nueva Ecija Provincial Crime Laboratory Office o NEPCLO si Konsehal Gave Calling ng Lungsod ng Cabanatuan upang magpa-eksamina ng kanyang urine specimen bunsod ng panghihikayat ni Cabanatuan City Vice Mayor Doc. Anthony Umali na nauna ng sumailalim sa Urine Drug Testing noong nakaraang linggo.
Ayon kay Konsehal Calling, ginawa ng Bise-Alkalde ang panghihikayat sa buong Sangguniang Panglungsod na magpa-drug test noong nakaraang martes bago matapos ang kanilang regular session.
Kinabukasan nito, araw ng miyerkules ng magpasya si Konsehal Calling na sumadya na rin sa NEPCLO upang magpa-drug test.
Dagdag ni Calling na nararapat lamang maipabatid sa taong bayan na ang kanilang mga inihalal na opisyal ay malinis at walang bahid ng dungis pagdating sa iligal na droga.
Naniniwala din ang Konsehal na sakali mang may magpositibong opisyal ng Pamahalaang Panglunsod ay maaaring mabigyan ng pangalawang pagkakataon upang makapagbagong buhay. -Ulat ni Jovelyn Astrero
