Nangibabaw mula sa 10 binibining lumahok sa Mutya ng Peñaranda ang 19 na taong gulang mula sa Brgy. San Josef na si Oscel Pinacate.
Si Oscel ay kapatid ng dating naging Mutya ng Peñaranda 2012 na si Marie Gellie S. Pinacate na naging kinatawan din sa Binibining Nueva Ecija 2012.
Kauna-unahang pagkakataon ng dalaga na sumali sa malakihang kompetisyon ng pagandahan.
Ayon sa kanya, tanging pangarap niya ay maging isang psychologist na nasimulan na niya nang makapagtapos ng kursong Bachelor of Science in Psychology sa The National Teachers College sa Quiapo Manila noong Marso, taong kasalukuyan.
Si Oscel ang magiging kinatawan ng Binibining Nueva Ecija 2016 na ilulunsad ng pamahalaang panlalawigan na gaganapin sa selebrasyon ng ika-isang daan at dalawampung taong pagdiriwang ng Unang Sigaw ng Nueva Ecija.
Samantala, kitang-kita rin sa mga lumahok ang determinadong manalo sa patimpalak.
Nagpatalbugan sa kanilang casual wear, swim wear at long gown.
Nagningning sa kanyang kasuotan si Candidate number 7, Giea Gorostiza na naiuwi ang dalawa sa major award, ang Best in Swim Wear at Best in Long Gown habang natanggap naman ni Candidate Number 8, Hazel P. Madrid ang Best in Casual Wear at naipanalo ang Mutya ng Peñaranda 3rd Runner-up.
Hinirang naman bilang 1st Runner-up ang pambato ng Brgy. 3 na si Anna Katrina A. Yabut habang 2nd runner-up ang pambato ng Brgy. 4 na si Jhasmine Mae M. Gallego. – Ulat ni Shane Tolentino
